La storie de creazion e dal prin om

Al jere un timp che il nestri mont nol esisteve: al esisteve dome Diu. Po Diu al creà il cîl e la tiere, ven a dî, l’univiers – dut ce che al è materiâl e temporâl. Tal prin cjapitul dal libri de Gjenesi, Mosè nus dîs che Diu al fasè chest lavôr de creazion tal zîr di sîs zornadis, e te setime zornade al polsà.

A rivuart de durade di chestis zornadis, e jere compagne de nestre. Seont chel che al scrivè lis notis margjinâls de Bibie par furlan (edizion 2018): «Par meti dacuardi la sience cu la fede, plui di un al à tirât fûr il cantin che no si fevele di zornade di vincjecuatri oris, ma di epochis. E je une sflocje. Chi si fevele di zornadis compagnis des nestris, dome che no si à di cjapâle come une pagjine di fisiche ma di religjon».

Te prime zornade de creazion, Diu al disè che e fos la lûs, e cheste e comparì. Diu al metè la lûs di une bande e il scûr di chê altre. Te seconde zornade, Diu al disè che la volte dal cîl si plantàs tal mieç des aghis. Il teren al vignì fûr te tierce zornade, cuant che Diu al disè che lis aghis si ingrumassin intun puest; daûr de peraule di Diu, il teren si taponà di vert: di jerbis e di pomârs. Te cuarte zornade, Diu al disè che a vignissin fûr i cuarps celescj – il soreli, la lune e lis stelis – e ju plantà tal cîl. Po Diu al disè, te cuinte zornade, che lis aghis a fossin dut un sbulium di robe vive e che i ucei a svolassin parsore de tiere.

Te seste zornade, Diu al disè che la tiere e butàs fûr nemâi: bestiis salvadiis, besteam e bestiis che si strissinin su la tiere. Diu al veve fat in mût che la tiere e fos un puest zovevul, là che i nemâi a podevin lâ in amôr e multiplicâsi. Dut al jere stât creât di Diu midiant de sô peraule; Diu al diseve che une robe e esistès, e cheste robe e comparive.

Podopo Diu, ancjemò te seste zornade, al fasè l’om. Diu al mostrà il so bonvolê cuant che al disè: «Fasìn l’om sul nestri stamp, che nus somei». Cussì Diu al fasè l’om sul so stamp, sul stamp di Diu, e i dè al om la paronance sui pes, sui ucei, sul besteam, sui nemâi salvadis e su lis bestiis che si strissinin su la tiere.

Tal secont cjapitul dal libri de Gjenesi, la creazion dal om e ven contade in maniere divierse: o leìn che Diu al fasè il stamp dal om cu l’arzile, po i soflà tes busis dal nâs une soflade di vite. Seont l’autôr des notis margjinâls de Bibie par furlan: «l’om al ven de tiere e al finissarà in tiere; cun dut chest Diu lu fâs cu lis sôs mans par dânus l’idee di trop grant che al è l’om».

Il prin om al viveve te felicitât; al saveve che dut al venive fûr di Diu, che dut ce che al esisteve al jere une dimostrazion de glorie e dal bonvolê di Diu. L’om al saveve ancje che dutis lis altris creaturis a jerin sot di lui, parcè che Diu al veve fat di lui il lôr paron. Po, par no che l’om al fos di bessôl, Diu i fasè un jutori: i fasè vignî une sium al om e i gjavà une cueste des sôs; cu la cueste che i veve tirât vie, Diu al fasè une femine e le menà denant dal om. Fevelant di jê, l’om al disè: «Cheste volte mo sì che e je vues dai miei vues e cjar de mê cjar! Cheste si clamarà femine par vie che e je stade gjavade fûr dal om!». Al è par chel che l’om al bandone so pari e sô mari e si tire dongje de sô femine, deventant une cjar sole.

L’om e la femine a jerin a stâ tal paradîs dal Eden, un zardin plen di dolçôrs, di ogni sorte di arbui che a butavin pomis deliziosis. L’om e la femine a vevin dirit di mangjâ a plasiment di ducj i arbui dal zardin; al jere però un arbul tal mieç dal zardin che al butave pomis plaçadis sot proibizion. Chest arbul si clamave l’arbul de cognossince dal ben e dal mâl; l’om e la femine no vevin dirit di mangjâ lis sôs pomis, pene la lôr vite. Cussì, midiant di chest ordin, Diu al metè l’om che al veve fat a lis provis.

E l’om al falì.

Dal madrac o leìn che al jere il plui galiot di dutis lis bestiis de tiere che Diu al veve fatis. Il madrac, volint sburtâ la femine al pecjât, al fasè in mût che cheste e mangjàs dal arbul de cognossince dal ben e dal mâl. Tun prin moment, a rivuart di chest arbul, la femine e fasè un memoreament des peraulis di Diu: «No vês ni di mangjânt ni di tocjânt, se no o murirês». Ma il madrac, jessint furfant, al lè indenant a fâ pression su la femine: «Çavariaiso? No je vere che o murirês! Ma Diu al sa che la dì che vualtris int mangjarês, si vierzaran i vuestris vôi e o sarês come i dius, che a cognossin il ben e il mâl». La femine e scoltà lis peraulis dal madrac: e çumà une pome dal arbul proibît e le mangjà; po int puartà al so om e ancje lui int mangjà.

Ce zornade amare no dome pal om e pe sô femine, ma ancje par ducj chei che a son vignûts in chest mont daûr di lôr! L’om e la femine no rivarin cu la prove di Diu: no si jerin conformâts al so ordin e a cometerin il prin pecjât. Par vie di cheste azion, l’om e la femine a pierderin la felicitât che a vevin cun Diu e si vuadagnarin i siei cjastics. Diu al fasè cressi lis doiis des gravidancis de femine; al fasè che e parturìs tal dolôr e che l’om al deventàs il so paron. Po, maludint la tiere, Diu i disè al om: «Tu varâs di tirâti fûr la bocjade a sun di vitis par ducj i dîs de tô vite. Ti butarà dome spinis e baraçs e tu varâs di mangjâ la jerbe dai cjamps. Cul sudôr de tô muse tu ti vuadagnarâs la bocjade, fin che no tu tornarâs te tiere, che tu sês stât tirât fûr di li. Parcè che tu tu sês pulvin e in pulvin tu tornarâs!» – une condane a fadiis e a muart.

Dopo dal cjastic, l’om i metè non Eve a la sô femine, parcè che e fo la mari di ducj i vivents. Di cumò indenant a son dôs personis: Adam (par ebraic ‘ādām, «tirât fûr de tiere») e Eve (par ebraic ḥawāh, «chê che e vîf»); il non comun al devente non di persone. Po, parâts fûr cu forin dal paradîs, Diu al metè denant dal zardin dal Eden i cherubins e la flame de spade fulminant, par fâ la vuaite al troi dal arbul de vite, par no che l’om al mangjàs ancje di chest. Cussì Adam e Eve a jessirin di une vite di gjonde, di une vite cence fature, e a jentrarin intun mont plen incolm di vitis e di dolôr.

Adam e Eve a sperimentarin il risultât de lôr disubidience ancjemò te conte dai lôr fîs Cain e Abêl. Cain, il prin fi, al lavorave la tiere; Abêl, il secont, al deventà pastôr di pioris. Al capità une volte che Cain i ufrì al Signôr di ce che al cjapave sù di tiere; so fradi Abêl invezit i ufrì i prins parts dal so trop e il lôr gras. Diu al vè agrât Abêl e la sô ufierte, ma nol cjalà di bon voli ni Cain ni la sô ufierte. Par chel Cain se cjapà cun Abêl e lu copà in plene campagne. In chel moment, cu la pierdite dal fi, Adam al veve di vê capide la finalitât de muart.